Qeyd edilənlər sadə dillə bir həqiqəti üzə çıxarır: şiəliyin gerçək mahiyyətini. Əgər əsas məsələ ateizmə qarşı mübarizə olsaydı, onda hənəfi, şafei, hənbəli kimi bir-birindən fərqlənən digər məzhəblər də narahatlıq doğurmalı idi. Eyni ilə sələfilər, vəhhabilər, nurçular, quranilər, əxbarilər və digər siyasi-dini cərəyanlar da hədəfə alınmalı idi. Lakin gördüyümüz mənzərə fərqlidir.
Bütün hücumların hədəfi həqiqi İslam – şiəlikdir. Fərqli adlar və bəhanələr göstərilsə də, nəticə eynidir: həqiqəti saxtakarlıqları ifşa edən bu məktəbi yalanlarla ləkələmək. Bu isə nə yalnız bu günün, nə də yalnız Azərbaycanın problemidir. Dünyanın harasında şiəlik varsa, orada da onun hədəfə alınması müşahidə olunur.
Bu həmlələrin əsas səbəbi isə Aşuradır. Aşura həm şiəliyin sistemli fəaliyyətini ortaya qoyur, həm də onu qoruma gücünə sahibdir. O, təkcə nəzəriyyə deyil, praktik əsaslarla artıq 1500 ildir ki, işləkdir, yaşayır və yaşadır. İmamət xəttində bütövləşən bu məktəbin əhatə dairəsi yalnız İmam Hüseynlə (ə) məhdudlaşmır. Mehdi düşüncəsində dünyanın ədalətli varislik ideyasını daşıyan bu ideoloji təməl elə buna görə böyük narahatlıqların hədəfindədir.
Bu gün yüzlərlə inanclının həbsi, ruhanilərin müxtəlif ittihamlarla azadlıqdan məhrum edilməsi, azyaşlı şiə övladlarının məscidlərə buraxılmasının yasaqlanması (məsələn, bir müddət öncə Qaraçuxur məscidində uşaqların təhsil almaq üçün toplaşması), dini ayinlərin yalnız məscid və ziyarətgahlarda icra olunmasına dair məhdudiyyətlər – bütün bunlar şiəliyin açıq şəkildə hədəfə alındığını göstərir. Hakimiyyət küçələrdə müxtəlif siyasi cərəyan nümayəndələrinin sərbəst toplaşmasına göz yumduğu halda, İmam Hüseynin (ə) Ərbəin günü küçədə ehsan paylayan inanclılara cinayət işi açması bu reallığın inkarolunmaz tərəfidir.
Lakin dəyişməz bir həqiqət var: bu addımlar daha ilk gündən uğursuzluğa məhkum idi. Bir zamanlar Hüseyni (ə) şəhid edənlər onun məramını məhv edəcəklərini düşündülər. Halbuki Hüseynin (ə) qanı Aşura kimi bir məktəbin yaranmasına səbəb oldu. Bu gün də Hüseynin davamçılarına qarşı yönələn bütün güclü təzyiqlər eyni həqiqəti göstərir: hədəfə alınan bu insanların mənəvi qaynağı elə həmin Aşura məktəbidir.
Qələbə mütləqdir 5-ci, sonuncu hissə