Zeydi orduya ən yüksək səviyyədə döyüşə hazırlıq əmri verdi

İraq Baş naziri və Silahlı Qüvvələrin Baş Komandanı Əli əz-Zeydi orduya döyüş hazırlığını ən yüksək səviyyəyə qaldırmağı əmr edib.

İraq Baş nazirinin Mətbuat Ofisinin açıqlamasına görə, Zeydi ölkənin təhlükəsizlik vəziyyətini və silahlı qüvvələrin hazırlıq səviyyəsini müzakirə etmək üçün Baş Komandan Ofisinin direktoru, Planlaşdırma Nazirliyinin müşaviri, bəzi müşavirlər və hərbi qüvvə komandirləri ilə görüş keçirib.

Görüşdə İraq silahlı qüvvələrinin hazırkı döyüş gücü qiymətləndirilib, eyni zamanda hava və dəniz qüvvələrinin, hava hücumundan müdafiə sistemlərinin və ordu aviasiyasının imkanları, eləcə də bu bölmələr üçün lazım olan müasir avadanlıq, alət və texnologiyalar müzakirə edilib.

İnkişaf edən hərbi texnologiyalara diqqət çəkən Zeydi, müasir hərbi qüvvələrin artıq yalnız adi silahlardan ibarət olmadığını bildirərək, hava gücünün, pilotsuz uçuş aparatlarının (PUA), hava hücumundan müdafiə sistemlərinin və texniki imkanların strateji əhəmiyyətini vurğulayıb.

Zeydi, hökumətin ordunun müdafiə qabiliyyətini gücləndirmək və resurslarını təkmilləşdirmək üçün bütün lazımi dəstəyi verməkdə qərarlı olduğunu bildirərək, silahlı qüvvələrin müharibəyə hazırlığının ən yüksək səviyyəyə çatdırılmasına çağırıb.

Zeydi qeyd edib ki, bu səylər İraqın milli təhlükəsizliyini və suverenliyini təmin etmək, eləcə də ölkənin hava məkanını, ərazi sularını və ərazi bütövlüyünü qorumaq məqsədi daşıyır.